البائعات الصينيات فى مصر يزيد خطر العنوسة

نقلا لبعض اراء المصريين فى الكلام عن موضوع البائعات الصينيات فى مصر و زواجهم من الشباب المصرى كانت تلك التعليقات و الكلام اللى اتقال (كلام مصر):

1-السبب 

 لن يتزوج المصري من صينيه الا لو ضاقت به السبل في الزواج من مصريه

2- العيب مش فى الصين

 العيب فى مجتمعنا اللى بيضيق على الشباب لحد ما يفكر فى الاسهل

و طبعا الاسهل بقى فى الصينى

يبقى الذنب مش فى الحل

الذنب فى اللى عمل المشكلة

" اذا جائكم من ترضون دينه و خلقه ، فزوجـــوه ، ان لم تفعلوا تكن فتنة فى الارض و فساد عظيم "

انا فرحان فى اب و ام كل بنت عانس لو كان هو السبب ، ايوه شماتة طبعا

خليه يتلم و يطبق كلام النبى عشان بنته تعيش و الشباب يعيش فى الحلال

 

3- حرام عليك

ماتيجى بالشكل ده على الامهات والابهات لان كل واحد بيشوف الاحسن لابنته واحنا للاسف فى مصر مؤمنين بأن الليجى رخيص يروح رخيص ونادراً لما تجد انسان محترم يصون زوجته ويعرف قيمتها بدون ما يكون دفع دم قلبه مش كل الامهات او الابهات بيقرفو العريس ولاكن فيه رجاله بتستسهل وتقول دولة مرطرطين على الارصفه وده لانه عارف ان فى بنات لا تشترط الشبكه او المهر وفيه ابهات بتساعد فى بناء عش الزوجيه لابنته وياريت كل راجل وكل فتاه يفكرو انه عندما يرددون خلف المأذون يقولون قبلة الذواج منك على سنة الله ورسوله ولاكن للاسف معظمهم لا يعرف سنة الله ورسوله وكيفية المعاملات الزوجيه

اللهم اهدى بناتنا وشبابنا الى ما تحب وترضى يارب العالمين امين امين امين

 

4- ياريت الصين تتبنانا

الصين دى بلد عظيمة بتعمل الثوم والعربيات والفوانيس والكومبيوتر والعرايس وكل اللى انتوا بتحبوة ماما الصين مش ماما امريكا

نصيحة للجيل الجديد اتعلموا اللغة الصينى فا الصين اتية يارب استرها استولت على السودان والدور على مصر دول الجراد قادم

 

5- زعلنين ليه

انتم زعلنين ليه وبعدين هى فيه وحده بتاخد جوز وحده تاتيه لا والله كل واحد وواحده بياخذ المكتوبله فى السماء ولاكن فسدة ارض الناس بما كسبت ايديهم يعنى البنت المصريه للاسف لو عملنا مقارنه بسيطه بنها وبين الفتاه الصينيه ستجد كافة الصينيه هى الرابحه

مثلاً الصينيه امراءه تحب العمل وتتفانا فيه ومتقعدش تتحصر وتقول مهو لو انا جوزى راجل كان ستتنى - الغيره تكاد تكون معدومه ( يعنى لو شافة جوزها فى حضن وحده تانيه ولاكأنها شافة حاجه )وبينى وبينكم هو ده الذى يحبه الرجال - المرءه الصينيه موفره اصلها حجمها صغير فى كل حاجه يعنى اسعار متطلباتها من اصغر شئ لاكبر شئ لا تؤثر على ميزانية الزوج والبقيه تأتى وياريت البنات والرجاله ميزعلوش - الزواج رزق فالكل يتقى الله فى نفسه وفيمن حوله والله يرزق من يشأ بغير حساب

 

6- طيب يعني نعمل ايه

نتجوز من جوه عاوزوين ملايين علشان يتجوزه نتجوز من بره تقولو خطر اللي مش عاجبه يدينا فلوس علشان نتجوز من جوه وانا م كل من يتزوج بصينيه يعني هو الصيني في كل حاجه جت علي الجواز

 

7- والله احسن

جوازه ببلاش يعنى ولا مهره ولا شقة بمليون جنية ولا عربية احدث موديل والله كويس

خلى بنات مصر يعنسو

8- طيب العنوسه موجوده لا محال

ان تزوج كل شاب بفتاه واحده هتبقة فى نسبةعنوسه على شان عدد النساء اكثر بكتير من عدد الرجال والله يا ابى ويا امى اعلمى ان الله قد روقكى البنت ليس لتعملى بها فى التجارة من ياتى بمهر اكثر وشقة افخم هو الذى يتزوج هذا لا يرضى الله سبحانه وتعالى واعلق على اخى من قال ان ال بيجى بسهوله بيروح بسهوله ليس غلط الدين فى انك تتساهل فى المهر ويأدى الى الطلاق ولكن انت لم تنفز كلام الدين اظفر بزات الدين خذ لبنتك صاحب الدين مش صاحب العربيات والطيرات واعلم ان الله سيعنى هذا الزوج فى اقرب الاوقات اتقى الله فى بنتك

9- إنذار

هذا إنذار لكل أب وأم فى مصـــر بألا يبالغوا فى المهور والمتطلبات.

والله المستعـــــــــــان...

10- مع كل أسف حصل و لكن ؟؟

لى صديق راجل محترم و ذو مركز مرموق (مدير بأحد البنوك الاستثمارية) و متزوج من سيدة مصرية من أسرة طيبة و زميلة له فى نفس البنك و دخلهم و الحمد لله كويس و مخلف 3 أبناء و لكن مش عارف أيةاللى حصل و زادت الخلافات بينهم كل يومين خناقات و تدخل من الاهل و الاصدقاء للاصلاح و أخيرا حدث الطلاق لاستحالة العشرة بينهما .. ثم عرفت المفاجاءة من العيار الثقيل فنعد حوالى 9 أشهر من الطلاق تعرف على أحدى الصينيات من اللى بيلفوا على المنازل و تزوجها ... و بعد أن كنت أوبخة أحيانا لتلك الزيجة .. تغيرت نظرتى تماما بعد أن دعانى للافطار عندة فى رمضان .. فقبلت الدعوة على أن يأخذنى بسيارتة .. و هالنى ما رأيت فما أن دخل الشقة (وهى بمدينة الرحاب) جاءت زوجتة الصينية و خلعت له الحذاء و أحضرت له طبق بلاستيك به ماء مخلوط بأشياء لها روائح ذكية و قامت بتدليك رجله .. و عند الاذان فرشت لنا سجادة الصلاة .. أما السفرة فحدث بلا حرج من أطايب الاصناف المصرية وغير المصرية و قد جلست معنا بعد الافطار للحديث و هى تتكلم اللكنة المصرية بعض الشىء أولا هى متعلمة تعليم عالى (خريجة أقتصاد) ثانيا كل ما طبختة من النت و هى تريد أرضاء زوجها فيما يحب من الطعام و قد عرفت أنها تقرأ فى الدين الاسلامى و الهادى هو الله يا سادة

11- الموضوع كبير ايها السادة

احنا بنبص للموضوع على انة زواج و خلاص و مش بنشوف الابعاد ال بعد كدة يا ايها السادة

الابعاد الجاية خطيرة جدا من اولاد و جنسية و ملة و ديانة و المشاكل تتوالى

و عوزين نخلى تفكيرنا اكبر من كدة بكتير علشان نلم المواضيع يا جماعة ارجوكم

12-موضوع تافه

الشاب المصرى حر

صينيه هنديه المهم الانسانه الى يستريح معاها

ال يعنى هنحافظ على السلاله

السلاله الفرعونيه

توتو بوتو شنجاها

تروح لاب مصرى يقولك هات و هات و هات

و انت بتاخد كام

طب هى الست الوالده طيبه ؟

ما انا مش عاوز بنتى معرفش ايه

و العروسه بقى هات و هات ولازم نعمل كذا و كذا

و ام العروسه بقى فى سرها هاه هينفع اتفشخر به قدام اخواتى و اقولهم جوز بنتى احسن منكم

و فى الاخر يا عينى البت بتعنس و تقعد تعيط و يبقى عندها 30 ولازم مش مخطوبه حتى

13- مع احترامي للملايكه

الشباب الذكور داخلين وقالبين الموضوع على الأسر المصريه !!

وكأن الأب المصرى بيتشرط !!! أو الأم المصريه بتستهبل !!

كلامكم ده لامؤاخذه كلام مش تمام

معظم الآباء النهارده بيطالبوا بالشقة ، وبيشاركوا في التجهيز والفرح !!

نسبه كبيره من الأسر دلوقت بتجوز بناتها قانون جديد بشرط ان العريس يكون له دخل ثابت كويس.

إنما اللي عايز يتجوز واحده ومعندوش شقه ولا معاه تمن نص الجهاز حتي ، ومعندوش دخل ثابت يفتح بيه بيت ، يبقى لا مؤاخذه ده عايز يعيش حياته ، مش عايز يؤسس أسره ، ويوفر لها المسكن

ده واحد بيتجوز على ما تفرج !! وأي واحد عنده أخت مش ح يرضى ليها انها تتجوز واحد على ما تفرج !!

وبلاش تححسوني اننا ملايكه

ياما أسر قدمت تسهيلات لشباب ، وفي الآخر أخدوا أكبر بومبه ، واسألوا نسب الطلاق المرتفع !!!

حديث الرسول صلى الله عليه وسلم واضح ، اللي يقدر يفتح بيت يتجوز ، واللي ما يقدرش يصبر ، مش يفتح بيت على ما تفرج

واخيرا وليس اخرا

لا يوجد ما يمنع اى مصرى او مسلم بالتحديد من ان يتزوج صينية او اى جنسية اخرى ما دامت من اهل الكتاب (مسلمة -مسيحية -يهودية) ولكن يبقى ان ننوه ان كل الاراء المعروضة لشباب مصرى متنوع التفكير و الاراء و يبقى رايك انت الشخصى على هذا السؤال

ما تزايد تزوج الشباب المصرى من الفتيات الصينيات؟؟؟

اكتب رايك وكن جرئ كلام مصر كلام لكل مصر و عن كل مصر و لكل مصر